Merkatoja është futur në orët e fundit të saj dhe drejtuesit e Milanit po nxitojnë të kompletojnë ekipin para se të bjerë gongu final, ndërsa emri i radhës që do të veshë fanellën kuqezi është mbrojtësi anësor portugez Diogo Dallot.
Futbollisti 21-vjeçar do të vijë në huazim të thjeshtë nga Manchester United për një sezon, pasi te “djajtë e kuq” ka shumë pak hapësira për të, ndërsa te Milani e shohin si një alternativë të vlefshme, pasi Dalot mund të luajë në të dy krahët e mbrojtjes.
Portugezi pritet të jetë zëvendësuesi i parë si për francezin Theo Hernandez, ashtu edhe për Davide Calabrian, duke qenë se njëri mes Laxalt dhe Andrea Contit pritet të largohet në orët e ardhshme, pasi i pari kërkohet nga Betis dhe tjetri nga Fiorentina.
Sa i përket qendrës së mbrojtjes, repart ku Milani i ka numrat e paktë për shkak të dëmtimeve, Bologna ka refuzuar 15 milionë euro për kartonin e japonezit Tomiyasu, ndaj drejtuesit e klubit kuqezi kanë kthyer sytë nga Antony Rodiger.
Mbrojtësi gjerman nuk është në planet e Lampard te Chelsea dhe do të mirëpriste një rikthim në Itali, aty ku edhe spikati me fanellën e Romës, ndërsa te Milani janë gati ta marrin me formulën e huazimit me të drejtë blerjeje në fund të sezonit të ardhshëm.
Përveç Rudiger, Maldini po mban të hapura edhe pistat që të çojnë te spanjolli i Realit, Nacho Monreal dhe argjentinasi i Fiorentinës German Pezzella, por veçanërisht ky i fundit është shumë i kushtueshëm për arkat e klubit kuqezi.
