Studentët e mjekësisë janë dëgjuar për herë të parë nga deputetët në Komisionin Parlamentar të Edukimit lidhur me argumentet që kanë kundër projektligjit që i detyron ata të nënshkruajnë një marrëveshje për të punuar në Shqipëri për pesë vite pas përfundimit të studimeve, pasi në të kundërt do të duhet të paguajnë një tarifë të kripur në bazë të kostove.
Studentët janë shprehur se ky draft cënon lirinë themelore të tyre dhe i vendos përballë dy zgjedhjeve të detyruara. Sipas tyre kjo nuk është forma e duhur për të mbajtur mjekët në vend, pasi pas përfundimit të kontratës, ata mund të ikin. Studentët kanë kërkuar që në vend të këtij drafti penalizues, qeveria duhet të ndërmarrë politika motivuese që të mbajë të rinjtë në vend.
Sipas tyre drafti është hartuar në mungesë totale transparence, duke mos llogaritur tarifat. Nga ana tjetër, për studentët nuk ka sens që tarifat e një universiteti publik të vendosen në bazë të kostove.
Deputetët e opozitës janë kundër këtij drafti, por ka pasur edhe anëtarë të radhët e mazhorancës që nuk janë dakord, por shprehen që gjithsesi do ta votojnë. Projektligji për studentët e mjekësisë po kalon me procedurë të përshpejtuar dhe do të votohet nga Kuvendi në seancën e së enjtes.
Elisabeta Dosku/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.
